Waxgarad iyo odayaal ka socda beesha Mudulood oo maanta shir jaraa’id ku qabtay magaalada Muqdisho ayaa sheegay in ay kulan la qaateen madaxda sare ee Dowlada Somalia ayna kala hadleen xaaladaha dalka iyo arimo kale oo quseeya beesha.

Xuseen Jilacow Dhegacadde oo ka mid ahaa odayaasha shirkaasi jaraa’id qabtay ayaa sheegay in madaxda sare ee dowlada Somalia ay ka ogolaadeen codsi ay beel ahaan hordhigeen oo ahaa inaan xilka qaadis ku sameynin Maareeyaha guud ee dekeda Muqdisho Cabdi Jiinow Calasow.

“Waxaan u mahad celineynaa masuuliyiinta sare ee dowlada sida madaxweynaha Shariif Shiikh Axmed Gudoomiyaha Baarlamanka Shiikh Aadan Madoobe iyo ra’isul wasaaraha Cumar C/rashiid Cali Sharma’arke oo naga ogolaaday codsigeenii si fiicana noo soo dhoweeyey” ayuu yiri Nabadoon Xuseen Jilacow Dhegacadde.



Sidoo kale. waxaa halkaasi ka hadlay Xasan Cali Maxamed (Wareento) oo ka mid ah waxgaradka beesha Mudulood isagoo sheegay in beesha Mudulood ay u dhan tahay codsigaasi aysana jirin wax khilaaf ah oo arintaasi ka taagan wuxuuna xusay in beeshu ay si buuxda u garab taagan tahay dowlada Somalia.

Hadalkan ka soo yeeray waxgaradka beesha Mudulood ayaa ku soo beegmaya xilli mudooyinkii ugu dambeeyey ay soo baxayeen warar la isla dhexmarayey oo sheegayey in masuuliyiinta dowlada Somalia ay doonayaan iney xilka ka qaadaan maareeyaha guud ee dekeda Muqdisho Cabdi Jiinow Calasow oo ah masuul wax badan ka soo qabtay kana soo shaqeeyey dekeda Muqdisho oo ah Isha ugu weyn ee dhaqaalaha ugu badan uu ka soo galo dowlada Somalia.

Muuse maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666