Abaara 2:00-habeenimo ayaa la maqlay dhawaca rasaasta noocyadooda kala duwan iyo madaafiic kaasi oo ay is dhaafsanayeen ciidamada dowlada KMG ah iyo xoogaga ka horjeeda ee isku hor fadhiya xaafado ka mid ah Bariga Magaalada Muqdisho.

Madaafiicda labada dhinac is dhaafsanayeen ayaa wal wal xoogan ku abuuray dadka Rayidka ah ee ku dhaqan Muqdisho oo xiligaasi ahaa kuwo hurdaya isla markaana ku sugan guryahooda.

Qaar ka mid ah dadka degmooyinkii xalay dagaalku ka dhacay oo saaka xiriiro kala duwan la sameynay ayaa inoo xaqiijiyay in dagaalkii xalay uu khasaare dhimasho iyo dhaawac ah u gaystay dad rayid ah.

Ilaa iyo 3-ruux ayaa la sheegay in ay ku geeriyoodeen degmooyinka boondheere iyo wardhiigleey oo ahaa halka dagaalada ugu xoogan ka dhacayeen.

Sidoo kale dagaalka ayaa la sheegay in ay ku dhaawacmeen dad ku dhaw 10-ruux kuwaasi oo lagu dabiibayo isbitaalada Muqdisho.

Lama oga khasaaraha soo kala gaaray dhinacyadii dagaalamay,iyada oo aan jirin wax war ah oo ka soo kala baxay labadaasi dhinac oo ay kaga hadlayaan dagaalkii xalay dhex maray.

Xaalada Magaalada Muqdisho ayaa saaka ah mid aad u dagan waloow dadka si weyn u hadal hayaan dagaalkii xalay iyo waliba dhaq dhaqaaqyada ciidan ee wali laga dareemayo dhinacyada ku hardamaya Magaalada Muqdisho.

Muuse maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666